سعودی ولی عہد کا چینی صدر کو باہمی تعلقات مضبوط بنانے کا پیغام

سعودی عرب کے ولی عہد اور وزیراعظم شہزادہ محمد بن سلمان نے چین کے صدر شی جن پنگ کو ایک اہم تحریری پیغام ارسال کیا ہے، جس میں دونوں برادر ممالک کے مابین دیرینہ اور گہرے باہمی تعلقات، انہیں مزید فروغ دینے کے طریقوں اور باہم دلچسپی کے تمام اہم علاقائی و عالمی امور پر تفصیلی گفتگو کی گئی ہے۔

سعودی قومی سلامتی کے مشیر مساعد بن محمد العیبان نے بیجنگ میں چین کے وزیر خارجہ وانگ یی سے خصوصی ملاقات کے دوران سعودی قیادت کا یہ پیغام ان کے سپرد کیا۔ اس اعلیٰ سطحی ملاقات کے دوران چینی وزیر خارجہ وانگ یی نے گفتگو کرتے ہوئے کہا کہ اس وقت خلیجی خطہ ایک بار پھر جنگ اور امن کے درمیان ایک انتہائی حساس اور اہم موڑ پر کھڑا ہے۔ انہوں نے اس امید کا اظہار کیا کہ تنازع میں ملوث تمام فریق جنگی جنون کے بجائے سنجیدہ مذاکرات اور بات چیت کے راستے کو اپنا کر کشیدگی اور دشمنی کا خاتمہ کریں گے۔

چینی وزیر خارجہ نے علاقائی سطح پر توانائی کی بلاتعطل فراہمی اور اہم بین الاقوامی بحری تجارتی راستوں کے تحفظ کو یقینی بنانے پر بھی زور دیا، اور اس عزم کا اعادہ کیا کہ چین سعودی عرب کے ساتھ مل کر دوطرفہ اسٹریٹجک تعلقات کو مزید بلند سطح پر لے جانے اور مشترکہ امن کے لیے ہر ممکن تعاون جاری رکھنے کے لیے مکمل طور پر تیار ہے۔