سعودی عرب کا امریکہ اور ایران کے درمیان جنگ بندی کا خیرمقدم

سعودی عرب نے امریکہ اور ایران کے درمیان دو ہفتوں کی جنگ بندی کے اعلان کا بھرپور خیرمقدم کرتے ہوئے اسے خطے میں امن و استحکام کی جانب ایک سنگِ میل قرار دیا ہے۔ سعودی وزارتِ خارجہ کی جانب سے جاری کردہ ایک سرکاری بیان میں امریکی صدر ڈونلڈ ٹرمپ اور پاکستان کے وزیراعظم شہباز شریف کے درمیان ہونے والے اس اہم معاہدے کو سراہا گیا ہے۔ سعودی عرب نے خاص طور پر وزیراعظم پاکستان کی جانب سے جنگ بندی کے لیے کی جانے والی موثر اور انتھک سفارتی کوششوں کو خراجِ تحسین پیش کرتے ہوئے کہا ہے کہ پاکستان نے ایک بار پھر عالمی امن کے لیے اپنا کلیدی کردار ثابت کر دیا ہے۔

سعودی وزارتِ خارجہ کے اعلامیہ میں پاکستان کے چیف آف آرمی اسٹاف فیلڈ مارشل عاصم منیر کے کردار کی بھی خصوصی تعریف کی گئی ہے۔ بیان میں کہا گیا ہے کہ فیلڈ مارشل عاصم منیر کی اسٹریٹجک بصیرت اور پسِ پردہ مخلصانہ کوششوں نے اس پیچیدہ جنگ بندی معاہدے کو ممکن بنانے میں اہم ترین کردار ادا کیا۔ سعودی عرب نے امید ظاہر کی ہے کہ پاکستان کی اس کامیاب ثالثی کے نتیجے میں ہونے والی یہ پیش رفت مشرقِ وسطیٰ میں مستقل امن اور خوشحالی کی راہ ہموار کرے گی، جبکہ سعودی قیادت نے اس سلسلے میں پاکستان کے ساتھ اپنا مکمل تعاون جاری رکھنے کے عزم کا اعادہ بھی کیا ہے۔