پاکستان روس تعلقات میں نئے باب کا آغاز، روسی وزیر داخلہ پاکستان پہنچ گئے

وفاقی وزیرِ داخلہ محسن نقوی کی خصوصی دعوت پر روس کے وزیرِ داخلہ ولادیمیر کولاکولتسیف (Vladimir Kolokoltsev) اپنے 4 روزہ اہم اور تاریخی سرکاری دورے پر پاکستان پہنچ گئے ہیں۔ پاکستان کی تاریخ میں کسی بھی روسی وزیرِ داخلہ کا یہ پہلا باقاعدہ اور باضابطہ دورہِ پاکستان ہے۔

اسلام آباد کے نور خان ایئرپورٹ پر آمد پر وزیرِ مملکت برائے امورِ داخلہ طلال چوہدری اور وفاقی وزرا نے روسی وزیرِ داخلہ کا پرتپاک اور پرشکوہ استقبال کیا۔

اپنے اس 4 روزہ دورے کے دوران روسی وزیرِ داخلہ اپنے پاکستانی ہم منصب محسن نقوی سمیت ملک کی اعلٰی سیاسی و عسکری قیادت سے اہم اور برائے راست ملاقاتیں کریں گے۔ ان ملاقاتوں میں دونوں ممالک کے درمیان دوطرفہ تعلقات کی استواری، بارڈر سیکیورٹی، انسدادِ دہشت گردی، انسدادِ منشیات اور دیگر بین الصوبائی و سیکیورٹی امور میں باہمی تعاون کے فروغ پر تفصیلی بات چیت کی جائے گی۔