جاپانی اخبار کا نمائندہ جاسوسی کے الزام میں گرفتار، ماسکو کا ٹوکیو پر صحافیوں کو استعمال کرنے کا الزام

روس کی وفاقی سیکیورٹی سروس (FSB) نے جاپانی اخبار ‘ہوکائیدو شمبن’ (Hokkaido Shimbun) کے نمائندے کو مبینہ طور پر جاسوسی اور حساس معلومات جمع کرنے کے الزام میں گرفتار کر کے تفتیش کے لیے دارالحکومت ماسکو منتقل کر دیا ہے۔

روسی سیکیورٹی ادارے ایف ایس بی کے مطابق ملزم روس کے مشرقِ بعید (Far East) میں واقع شہر یوزنو سخالنسک میں جاپانی اخبار کے نمائندے کے طور پر کام کر رہا تھا۔ جاپانی شہری کو سخالین ریجن سے بیرونِ ملک روانگی سے قبل حراست میں لیا گیا، جس کے بعد اسے فوری طور پر ماسکو منتقل کر دیا گیا۔ ایف ایس بی کے تحقیقاتی شعبے نے ملزم کے خلاف روسی فوجداری قانون کی دفعہ 276 کے تحت جاسوسی کا باقاعدہ مقدمہ درج کر لیا ہے، جبکہ ماسکو کی لیفورتوو ڈسٹرکٹ کورٹ نے اسے پولیس حراست میں بھیجنے کا حکم جاری کر دیا ہے۔

واقعے پر شدید ردِعمل دیتے ہوئے روسی وزارتِ خارجہ کی ترجمان ماریہ زخارووا (Maria Zakharova) نے کہا کہ ٹوکیو کی جانب سے روس میں غیر ملکی صحافی کا درجہ رکھنے والے اپنے شہریوں کو انٹیلی جنس معلومات جمع کرنے کے لیے استعمال کرنا انتہائی افسوس ناک ہے۔ ماریہ زخارووا نے الزام عائد کیا کہ ان سرگرمیوں کا بنیادی مقصد روسی ریاست کی سلامتی کو نقصان پہنچانا ہے اور یہ کوئی الگ تھلگ واقعہ نہیں ہے۔ گرفتار صحافی کی شناخت اور جاپانی حکومت کا موقف تاحال سامنے نہیں آیا ہے۔