روسی حملوں میں یوکرین میں 6 افراد ہلاک، 20 زخمی

یوکرین کے مختلف شہروں پر روس کے تازہ ترین اور شدید فضائی حملوں کے نتیجے میں کم از کم 6 افراد ہلاک جبکہ 20 افراد زخمی ہو گئے ہیں۔ بین الاقوامی خبر رساں ادارے ‘رائٹرز’ کے مطابق یوکرین کے شہر خارکیف میں ایک مصروف گروسری اسٹور پر روسی حملے کے باعث 3 افراد جان کی بازی ہار گئے، جبکہ زخمی ہونے والوں میں 2 معصوم بچے بھی شامل ہیں۔

رپورٹس کے مطابق مغربی یوکرین میں ہونے والے روسی حملوں کے نتیجے میں مزید 3 افراد ہلاک ہو گئے، جبکہ ان حملوں کی زد میں آ کر متعدد رہائشی عمارتیں بری طرح متاثر ہوئیں اور کئی گاڑیاں جل کر خاکستر ہو گئیں۔ دلخراش واقعات کے بعد ریسکیو اور امدادی ٹیموں نے فوری طور پر متاثرہ علاقوں میں ہنگامی کارروائیاں شروع کر دی ہیں، جبکہ زخمیوں کو قریبی اسپتالوں میں طبی امداد فراہم کرنے اور جانی و مالی نقصان کا حتمی تخمینہ لگانے کا سلسلہ جاری ہے۔