عالمی شہرت یافتہ مصری قرّاء کرام پاکستان پہنچ گئے، وفاقی وزیر مذہبی امور کا خیر مقدم

عالمی شہرت یافتہ مصری قراء کرام پاکستان پہنچ گئے ہیں، جہاں وفاقی وزیر مذہبی امور سردار محمد یوسف نے وزارت آمد پر ان کا پرجوش خیر مقدم کیا۔ پاکستان پہنچنے والے قراء میں قاری ایوب عاصف، قاری طہٰ نعمانی، قاری ابراہیم عاصف، قاری ماہر الشناوی اور قاری اسماعیل عاصف شامل ہیں۔ اس موقع پر وفاقی وزیر اور دیگر شرکاء نے مصری قراء کرام سے ان کی دلنشیں آوازوں میں تلاوتِ قرآنِ کریم سننے کا شرف حاصل کیا۔ سردار محمد یوسف نے کہا کہ پاکستانی قوم قرآنِ کریم اور خدامِ قرآن سے گہری محبت رکھتی ہے اور مصری قراء کی آمد اہلِ پاکستان کے لیے باعثِ مسرت ہے۔ انہوں نے بتایا کہ مصری قراء کرام 5 ستمبر کو بعد نمازِ عصر فیصل مسجد اسلام آباد میں عوام الناس کے لیے منعقد کی جانے والی عظیم الشان محفلِ حسنِ قرأت میں شرکت کریں گے، جو اسلامی اخوت اور قرآن کے پیغام کے فروغ کا ذریعہ بنے گی۔