آئرلینڈ کی سفیر کی صوبائی وزیر اقلیتی امور سردار رمیش سنگھ اروڑہ سے ملاقات

صوبائی وزیر اقلیتی امور سردار رمیش سنگھ اروڑہ سے آئرلینڈ کی سفیر میری او’نیل نے اہم ملاقات کی جس میں پنجاب مینارٹی کارڈ، انسانی حقوق، بین المذاہب ہم آہنگی اور اقلیتوں کی جامع ترقی پر تفصیلی گفتگو ہوئی۔ اس ملاقات میں سیکرٹری ہیومن رائٹس اینڈ مینارٹیز افیئرز ڈاکٹر عثمان علی خان، سی ای او آگاہی مبارک علی سرور اور آئرش ایمبیسی سے کیرولینا فولے بھی موجود تھیں۔ صوبائی وزیر نے آئرش سفیر کو بتایا کہ وزیراعلیٰ پنجاب مریم نواز کی قیادت میں تاریخ میں پہلی بار 6 بڑے اقلیتی مذہبی تہوار سرکاری سطح پر منائے جا رہے ہیں۔

سردار رمیش سنگھ اروڑہ نے مزید بتایا کہ پنجاب حکومت نے اقلیتی علاقوں، عبادت گاہوں اور قبرستانوں کی ترقی و بحالی کے لیے 4 ارب روپے کے فنڈز مختص کیے ہیں۔ آئرلینڈ کی سفیر میری او’نیل نے وزیراعلیٰ مریم نواز کے اقلیت دوست اقدامات اور فلاحی پالیسیوں کی بھرپور پذیرائی کی اور اقلیتوں کی معاشی خودمختاری و خوشحالی کے لیے پنجاب حکومت کی کاوشوں کو سراہا۔ دونوں رہنماؤں نے مذہبی ہم آہنگی اور اقلیتی حقوق کے تحفظ کے لیے باہمی تعاون کو مزید آگے بڑھانے پر اتفاق کیا۔