راول ڈیم کے سپل ویز پیر صبح 6 بجے کھولنے کا فیصلہ

مون سون کی شديد بارشوں کے باعث راول ڈیم میں پانی کی سطح میں مسلسل اضافہ ہو رہا ہے، جس کے پیشِ نظر ضلعی انتظامیہ اسلام آباد نے ڈیم کے سپل ویز کھولنے کا فیصلہ کیا ہے۔ انتظامیہ کے مطابق پانی کی سطح 1751.40 فٹ تک پہنچنے کے بعد اضافی پانی کے اخراج کے لیے سپل ویز 31 اگست کی صبح 6 بجے کھولے جائیں گے۔ اس سلسلے میں پولیس، ریسکیو 1122 اور دیگر تمام متعلقہ اداروں کو الرٹ رہنے اور ضروری حفاظتی اقدامات یقینی بنانے کی ہدایت جاری کر دی گئی ہے۔ دوسری جانب ضلعی انتظامیہ نے شہریوں پر زور دیا ہے کہ وہ ندی نالوں اور نشیبی علاقوں کے قریب جانے سے گریز کریں اور کسی بھی ایمرجنسی سے بچنے کے لیے انتظامی ہدایات پر عمل کریں۔