راہول گاندھی کی قیادت میں اپوزیشن کا مارچ، چیف الیکشن کمشنر سے استعفے کا مطالبہ

:

بھارتی اپوزیشن جماعت کانگریس کے سینئر رہنما راہول گاندھی کی قیادت میں متحدہ اپوزیشن اتحاد اور ‘کاکروچ جنتا پارٹی’ (CJP) کے اراکین نے نئی دہلی میں سپریم کورٹ کی جانب احتجاجی مارچ کیا اور بھارت کے چیف الیکشن کمشنر گیانیش کمار سے فوری استعفے کا مطالبہ کر دیا ہے۔

اپوزیشن رہنماؤں اور مظاہرین نے الیکشن کمیشن پر شدید الزامات عائد کرتے ہوئے کہا کہ چیف الیکشن کمشنر گیانیش کمار نے حکمران جماعت بھارتیہ جنتا پارٹی (بی جے پی) کو فائدہ پہنچانے کے لیے اپوزیشن کے ہمدرد اور مخالف سمجھے جانے والے تقریباً 13 کروڑ ووٹرز کے نام انتخابی فہرستوں سے مبینہ طور پر خارج کر دیے ہیں۔ اس دھاندلی کے خلاف اپوزیشن جماعتوں میں شدید غصہ اور تشویش پائی جاتی ہے۔ رپورٹس کے مطابق ‘کاکروچ جنتا پارٹی’ کا نام بھارتی چیف جسٹس سوریا کانت کے ایک حالیہ تبصرے کے بعد علامتی طور پر سامنے آیا، تاہم چیف جسٹس آف انڈیا نے احتجاج کرنے والی اپوزیشن قیادت کی ملاقات کی درخواست قبول کرنے سے انکار کر دیا۔

دوسری جانب، وزیراعظم نریندر مودی کی حکومت نے نئی دہلی کے تاریخی احتجاجی مقام ‘جنتر منتر’ پر ہر قسم کے مظاہروں پر پابندی عائد کر رکھی ہے۔ اپوزیشن کے اس مارچ کو روکنے کے لیے دارالحکومت میں سیکیورٹی کے انتہائی سخت انتظامات کیے گئے، جس کے باعث سیکیورٹی وجوہات کی بنا پر متعدد میٹرو اسٹیشنز کو بند کر دیا گیا اور اہم شاہراہیں بلاک ہونے سے ٹریفک کا نظام بری طرح متاثر ہوا۔