غریبوں پر بوجھ اور امیروں کو ریلیف ، پی ٹی آئی نے بجٹ مسترد کردیا

اسلام آباد: پاکستان تحریک انصاف نے آئندہ مالی سال 2026-27 کے وفاقی بجٹ کو مسترد کرتے ہوئے اسے غریب دشمن اور امیروں کو فائدہ پہنچانے والا بجٹ قرار دیا ہے۔

پی ٹی آئی کے مرکزی سیکریٹری اطلاعات شیخ وقاص اکرم نے کہا کہ یہ مسلم لیگ (ن) کا بجٹ ہے جس میں عام شہریوں پر بوجھ ڈالا گیا ہے جبکہ مراعات یافتہ طبقے کو ریلیف فراہم کیا گیا ہے۔

انہوں نے الزام عائد کیا کہ حکومت نے بجٹ میں اعداد و شمار میں ردوبدل اور ہیرا پھیری کی ہے، جبکہ ٹیکس پالیسی ایماندار ٹیکس دہندگان کو ہراساں کرنے کے لیے استعمال کی جا رہی ہے۔

شیخ وقاص اکرم کے مطابق فیس لیس آڈٹ سسٹم کے ذریعے کاروباری طبقے کو نشانہ بنایا جا رہا ہے، جبکہ ٹیکس چوری کے بڑے معاملات کو نظر انداز کیا جا رہا ہے۔

انہوں نے کہا کہ گزشتہ تین سے چار بجٹ میں حکومت نے مسلسل نئے ٹیکس عائد کیے ہیں، جس سے عام آدمی کی مشکلات میں اضافہ ہوا ہے۔

پی ٹی آئی رہنما نے مزید کہا کہ یہ بجٹ غریبوں کو معمولی ریلیف دے کر امیروں کو فائدہ پہنچاتا ہے، اس لیے اسے مکمل طور پر مسترد کیا جاتا ہے۔

واضح رہے کہ قومی اسمبلی میں بجٹ اجلاس کے دوران پی ٹی آئی اراکین نے احتجاج کرتے ہوئے اسپیکر ڈائس کا گھیراؤ کیا، بجٹ دستاویزات پھاڑ دیں اور وزیر خزانہ کی تقریر کا بائیکاٹ بھی کیا۔