آزاد کشمیر انتخابات: تحریک انصاف نے 11 رکنی اپیلیٹ بورڈ قائم کر دیا

اسلام آباد: پاکستان تحریک انصاف نے آزاد جموں و کشمیر قانون ساز اسمبلی کے انتخابات کے لیے اہم تنظیمی فیصلہ کرتے ہوئے 11 رکنی اپیلیٹ بورڈ تشکیل دے دیا ہے۔

پارٹی چیئرمین بیرسٹر گوہر علی خان اور سیکرٹری جنرل کی منظوری سے قائم کیے گئے اپیلیٹ بورڈ نے اپنی ذمہ داریاں سنبھال لی ہیں۔ بورڈ امیدواروں کے انتخاب سے متعلق اپیلوں، اعتراضات اور دیگر معاملات کا جائزہ لے گا۔

جاری کیے گئے نوٹیفکیشن کے مطابق اپیلیٹ بورڈ امیدواروں کی حتمی منظوری کی مقررہ مدت سے 96 گھنٹے قبل اپنی کارروائی مکمل کرے گا تاکہ انتخابی عمل کو بروقت اور شفاف انداز میں آگے بڑھایا جا سکے۔

تحریک انصاف کے مطابق آزاد کشمیر انتخابات میں حمایت یافتہ امیدواروں اور انتخابی نشان سے متعلق حتمی فیصلے اپیلیٹ بورڈ کی سفارشات کی روشنی میں کیے جائیں گے۔

اپیلیٹ بورڈ کے ارکان میں احمد چٹھہ، علی امین گنڈاپور، علی بخاری، اسد قیصر، فردوس نقوی، خالد خورشید، نیاز اللہ نیازی، سیف اللہ خان نیازی، سلمان اکرم راجہ اور شاہد خٹک شامل ہیں، جبکہ چیئرمین پاکستان تحریک انصاف بیرسٹر گوہر علی خان بھی بورڈ کا حصہ ہیں۔

پارٹی قیادت نے آزاد کشمیر انتخابات کے لیے امیدواروں سے متعلق تمام معاملات نمٹانے کی ذمہ داری اپیلیٹ بورڈ کو سونپ دی ہے۔ نوٹیفکیشن پر چیئرمین بیرسٹر گوہر علی خان کے دستخط موجود ہیں۔