جائیداد کی خرید و فروخت پر ودہولڈنگ ٹیکس میں کمی کی تجویز

اسلام آباد: وفاقی حکومت نے مالی سال 2026-27 کے بجٹ میں جائیداد کے شعبے کو ریلیف دینے کے لیے خرید و فروخت پر عائد ودہولڈنگ ٹیکس کی شرحوں میں نمایاں کمی کی تجویز پیش کردی ہے۔

وفاقی وزیر خزانہ سینیٹر محمد اورنگزیب نے قومی اسمبلی میں بجٹ تقریر کے دوران کہا کہ حکومت کا مقصد جائیداد کے شعبے میں سرمایہ کاری کی حوصلہ افزائی اور کاروباری سرگرمیوں کو فروغ دینا ہے، اسی لیے ٹیکس ڈھانچے میں نرمی لانے کی سفارش کی گئی ہے۔

وزیر خزانہ کے مطابق جائیداد خریدنے والے فائلرز کے لیے ودہولڈنگ ٹیکس کی شرح 2 اعشاریہ 5 فیصد سے کم کرکے 1 اعشاریہ 25 فیصد کرنے کی تجویز دی گئی ہے، جس سے خریداروں پر مالی بوجھ میں نمایاں کمی آئے گی۔

انہوں نے بتایا کہ جائیداد فروخت کرنے والے فائلرز کے لیے بھی ودہولڈنگ ٹیکس کی شرح 5 اعشاریہ 5 فیصد سے کم کرکے 2 اعشاریہ 75 فیصد کرنے کی تجویز شامل کی گئی ہے۔

حکومتی حلقوں کے مطابق ان اقدامات کا مقصد تعمیرات اور جائیداد کے شعبے میں سرمایہ کاری کے رجحان کو بڑھانا اور معاشی سرگرمیوں کو مزید متحرک بنانا ہے۔ اگر پارلیمان سے منظوری مل گئی تو یہ رعایتیں نئے مالی سال سے نافذ العمل ہوں گی۔