جنگِ ستمبر و مئی میں پاک فضائیہ کے شاہینوں نے فیصلہ کن کردار ادا کیا: صدر، وزیراعظم

اسلام آباد: صدرِ مملکت آصف علی زرداری اور وزیراعظم محمد شہباز شریف نے یومِ پاک فضائیہ کے موقع پر اپنے خصوصیت پیغامات میں پاک فضائیہ کے شاہینوں کی پیشہ ورانہ صلاحیتوں، شجاعت اور وطنِ عزیز کے فضائی دفاع کے لیے دی جانے والی قربانیوں کو زبردست خراجِ تحسین پیش کیا ہے۔

صدرِ مملکت آصف علی زرداری نے اپنے بیان میں کہا کہ معرکۂ حق میں پاک فضائیہ نے بری اور بحری افواج کے ساتھ مل کر فیصلہ کن اور تاریخی کردار ادا کیا۔ انہوں نے کہا کہ ہمارے شاہینوں نے بارہا یہ ثابت کیا ہے کہ دشمن چاہے کتنا ہی طاقتور یا تعداد میں زیادہ کیوں نہ ہو، وہ قوم کے عزم اور جذبے کو شکست نہیں دے سکتا۔

وزیراعظم محمد شہباز شریف نے پاک فضائیہ کے افسران اور جوانوں کے لیے نیک تمناؤں کا اظہار کرتے ہوئے کہا کہ پاک فضائیہ نے ہر معرکے میں اپنی برتری، تکنیکی مہارت اور پیشہ ورانہ شجاعت کا لوہا منوایا ہے۔ وزیراعظم نے ستمبر 1965ء کی جنگ سمیت گزشتہ برس مئی کی پیش رفت کا حوالہ دیتے ہوئے کہا کہ فضائیہ نے تمام مسلح افواج کے ساتھ مثالی ہم آہنگی کا مظاہرہ کرتے ہوئے تعداد میں کم ہونے کے باوجود دشمن کو دندان شکن جواب دیا اور ملکی دفاع کو ناقابلِ تسخیر بنایا۔