پوری قوم میجرعزیز بھٹی شہید کی حب الوطنی کو سلام پیش کرتی ہے: صدر، وزیراعظم

صدرِ مملکت آصف علی زرداری اور وزیراعظم محمد شہباز شریف نے 1965ء کی جنگ کے عظیم ہیرو میجر عزیز بھٹی شہید (نشانِ حیدر) کے 61 ویں یومِ شہادت پر انہیں درجات کی بلندی کی دعاؤں کے ساتھ زبردست خراجِ عقیدت پیش کیا ہے۔ صدرِ مملکت آصف علی زرداری نے اپنے پیغام میں کہا کہ میجر عزیز بھٹی نے مادرِ وطن کے دفاع کے لیے اپنی جان کا نذرانہ دے کر تاریخ میں اپنا نام ہمیشہ کے لیے امر کر دیا ہے۔ انہوں نے زور دیا کہ شہداء کی قربانیاں ہماری آزادی، خودمختاری اور قومی سلامتی کی مضبوط بنیاد ہیں اور قوم اپنے بہادر سپوتوں کی خدمات کو ہمیشہ یاد رکھے گی۔

وزیراعظم محمد شہباز شریف نے میجر عزیز بھٹی شہید کی شجاعت کو خراجِ تحسین پیش کرتے ہوئے کہا کہ 1965ء کی جنگ کے دوران برکی سیکٹر میں دشمن کی پیش قدمی کے آگے سیسہ پلائی ہوئی دیوار بن کر کھڑے ہونا ملکی تاریخ کی ایک روشن داستان ہے۔ وزیراعظم نے کہا کہ 12 ستمبر 1965ء کو جامِ شہادت نوش کرنے والے اس عظیم سپوت کی بے لوث محبت اور جانفشانی آنے والی نسلوں اور بالخصوص نوجوانوں کے لیے مشعلِ راہ ہے۔ انہوں نے اس عزم کا اعادہ کیا کہ دفاعِ وطن کے لیے شہداء کی قربانیاں قوم کا سب سے قیمتی اثاثہ ہیں۔