گلگت بلتستان میں حکومت سازی کا اختیار بلاول بھٹو کو سونپ دیا گیا

گلگت: گلگت بلتستان کے حالیہ عام انتخابات کے معرکے کے بعد سیاسی سرگرمیاں عروج پر پہنچ گئی ہیں۔ گلگت میں پاکستان پیپلز پارٹی (PPP) گلگت بلتستان کی پارلیمانی پارٹی کا ایک اہم اور مشاورتی اجلاس منعقد ہوا، جس کی صدارت پی پی پی کے مرکزی جنرل سیکریٹری سینیٹر نیر حسین بخاری نے کی۔

اجلاس میں نو منتخب اراکینِ اسمبلی اور پارٹی قیادت نے انتخابی نتائج اور خطے میں آئندہ کی سیاسی حکمتِ عملی کا تفصیلی جائزہ لیا۔

پارلیمانی پارٹی نے انتخابی نتائج پر گہرے اطمینان کا اظہار کیا کہ پاکستان پیپلز پارٹی تمام تر سیاسی چیلنجز کے باوجود گلگت بلتستان اسمبلی میں سنگل لارجسٹ پارٹی (سب سے بڑی جماعت) کے طور پر ابھر کر سامنے آئی ہے۔ اجلاس کے شرکاء نے متفقہ طور پر کہا کہ پارٹی کی اس شاندار کامیابی کی بنیاد چیئرمین بلاول بھٹو زرداری اور آصفہ بھٹو زرداری کی متحرک اور بھرپور انتخابی مہم تھی، جس نے خطے کے سیاسی منظرنامے کو تبدیل کر دیا۔

اجلاس کا مرکزی ایجنڈا گلگت بلتستان میں نئی حکومت کی تشکیل تھا، جس کے حوالے سے درج ذیل اہم فیصلے کیے گئے: “پارلیمانی پارٹی کے تمام اراکین نے پارٹی چیئرمین بلاول بھٹو زرداری پر اپنے مکمل اور غیر مشروط اعتماد کا اظہار کیا ہے۔ اجلاس میں متفقہ فیصلہ کیا گیا کہ گلگت بلتستان میں حکومت سازی، اتحادیوں کے انتخاب اور دیگر سیاسی آپشنز سے متعلق تمام حتمی فیصلوں کا اختیار چیئرمین کو سونپ دیا گیا ہے”۔

اراکینِ پارلیمانی پارٹی کا کہنا تھا کہ چیئرمین بلاول بھٹو زرداری گلگت بلتستان کے عوام کی فلاح و بہبود اور پارٹی کے وسیع تر سیاسی مفاد میں جو بھی لائحہ عمل طے کریں گے، تمام اراکین اس کی مکمل پاسداری کریں گے اور وہ فیصلہ سب کو قبول ہوگا۔ اس فیصلے کے بعد اب جی بی (GB) میں حکومت سازی کی حتمی گیند پی پی پی کی مرکزی قیادت کے کورٹ میں چلی گئی ہے۔