وفاقی آئینی عدالت کا بڑا فیصلہ، پولٹری فیڈ ملز پر 4 فیصد اضافی ٹیکس غیر قانونی قرار

بجٹ سے چند روز قبل وفاقی حکومت کو ریونیو کی مد میں بڑا دھچکا لگ گیا، وفاقی آئینی عدالت نے غیر رجسٹرڈ پولٹری فارمز کو فیڈ کی فراہمی پر عائد 4 فیصد اضافی ٹیکس کو غیر قانونی قرار دیتے ہوئے لاہور ہائیکورٹ کا فیصلہ کالعدم کر دیا۔

جسٹس عامر فاروق کی سربراہی میں دو رکنی بینچ نے پولٹری فیڈ ملز کی درخواستوں پر فیصلہ سناتے ہوئے قرار دیا کہ اضافی ٹیکس کی وصولی قانون کے سیکشن 31 اے کی تشریح سے مطابقت نہیں رکھتی۔

عدالت نے اپنے فیصلے میں کہا کہ غیر رجسٹرڈ پولٹری فارمز کو فیڈ کی فراہمی پر اضافی ٹیکس 2024 کے مالیاتی قانون کے تحت وصول کیا جا رہا تھا، تاہم متعلقہ قانون میں اس حوالے سے ابہام موجود ہے۔

فیصلے کے مطابق پولٹری فارمز کو ٹیکس سے استثنیٰ حاصل ہے اور استثنیٰ ملنے کے بعد ان پر رجسٹریشن کی پابندی بھی عائد نہیں ہوتی۔ عدالت نے قرار دیا کہ جب رجسٹریشن قانونی طور پر لازم نہیں تو غیر رجسٹرڈ ہونے کی بنیاد پر پولٹری فارمز یا فیڈ ملز کو اضافی ٹیکس یا سزا کا سامنا نہیں کرنا چاہیے۔

واضح رہے کہ لاہور ہائیکورٹ نے اس سے قبل پولٹری فیڈ ملز سے 4 فیصد اضافی ٹیکس کی وصولی کو درست قرار دیا تھا، جس کے خلاف فیڈ ملز مالکان نے وفاقی آئینی عدالت سے رجوع کیا تھا۔