عالمی چیلنجز سے نمٹنے کیلئے اقوام متحدہ کو مزید مضبوط بنانا ہوگا: وزیراعظم

وزیراعظم شہباز شریف سے اقوام متحدہ کے سیکرٹری جنرل کے امیدوار سفیر اولارا اوتونو (Olara Otunnu) نے اسلام آباد میں اہم ملاقات کی، جن کے ہمراہ یوگنڈا کے صدر کے خصوصی ایلچی اور سابق وزیراعظم روہاکانا روگونڈا بھی موجود تھے۔ اس اعلیٰ سطح کی ملاقات میں نائب وزیراعظم و وزیر خارجہ اسحاق ڈار، وزیراعظم کے معاونِ خصوصی طارق فاطمی اور سیکرٹری خارجہ آمنہ بلوچ نے بھی شرکت کی۔ گفتگو کے دوران وزیراعظم نے اقوام متحدہ کے منشور، عالمی قوانین کے احترام اور کثیرالجہتی نظام (Multilateralism) سے پاکستان کی پختہ وابستگی کا اعادہ کرتے ہوئے کہا کہ موجودہ عالمی چیلنجز سے نمٹنے کے لیے اقوام متحدہ کے پلیٹ فارم کو مزید فعال اور مضبوط بنانا وقت کی اہم ضرورت ہے۔