وزیراعظم کی صدر بیلاروس سے ملاقات، دورہ پاکستان کی دعوت دے دی

وزیراعظم محمد شہباز شریف نے بشکیک میں شنگھائی تعاون تنظیم (SCO) کے 26ویں سربراہی اجلاس کے موقع پر جمہوریہ بیلاروس کے صدر الیگزینڈر لوکاشینکو سے اہم ملاقات کی، جس میں دونوں رہنماؤ ں نے دوطرفہ تعلقات کی مثبت پیش رفت پر اطمینان کا اظہار کیا۔

ملاقات کے دوران وزیراعظم شہباز شریف اور صدر لوکاشینکو نے سیاسی، تجارتی، اقتصادی، دفاعی اور ثقافتی شعبوں میں جاری تعاون کو مزید مضبوط بنانے کے عزم کا اعادہ کیا۔ دونوں رہنماؤ ں نے نومبر 2024ء میں صدر لوکاشینکو کے تاریخی دورۂ پاکستان اور اپریل 2025ء میں وزیراعظم کے بیلاروس کے دورے کا حوالہ دیتے ہوئے تجارت، صنعت، زراعت، انفارمیشن ٹیکنالوجی اور فنی تربیت کو باہمی تعاون کے لیے ترجیحی شعبے قرار دیا۔

وزیراعظم شہباز شریف نے شنگھائی تعاون تنظیم کی کونسل آف ہیڈز آف اسٹیٹ کی آئندہ چیئرمین شپ کے تناظر میں صدر الیگزینڈر لوکاشینکو کو اگلے سال پاکستان کا سرکاری دورہ کرنے کی پرخلوص دعوت دی۔ دونوں ممالک کے سربراہان نے پاکستان اور بیلاروس کے دیرینہ دوستانہ تعلقات کو نئی بلندیوں تک لے جانے اور باہمی مفاد پر مبنی شراکت داری کو فعال بنانے کے مشترکہ عزم کا اعادہ کیا۔