وزیراعظم کا پاک فضائیہ کیلئے پیشہ ورانہ کامیابی اور ترقی کیلئے نیک تمناؤں کا اظہار

وزیراعظم محمد شہباز شریف نے یومِ فضائیہ کے موقع پر اپنے خصوصی پیغام میں پاک فضائیہ کی پیشہ ورانہ کامیابی اور مستقبل کی پیش رفت کے لیے نیک تمناؤں کا اظہار کیا ہے۔ وزیراعظم نے کہا کہ پاک فضائیہ نے ہر معرکے میں اپنی اعلیٰ پیشہ ورانہ صلاحیت، جنگی مہارت اور فضائی برتری کا لوہا منوایا ہے۔ انہوں نے زور دیا کہ یہ ممتاز ادارہ قربانی، جرات اور شجاعت کی ایک قابلِ فخر تاریخ کا حامل ہے۔ 1965ء کی جنگِ ستمبر کا ذکر کرتے ہوئے وزیراعظم نے کہا کہ پاک فضائیہ کے شاہینوں نے بے مثال جرات کے ساتھ وطن کی فضائی حدود کا کامیاب دفاع کیا، جبکہ گزشتہ برس مئی کے معرکے میں بھی پاکستان نے جارح دشمن کو نانی یاد دلاتے ہوئے واضح شکست سے دوچار کیا۔ وزیراعظم نے مزید کہا کہ پاک فضائیہ نے بری اور بحری افواج کے ساتھ مثالی ہم آہنگی کا مظاہرہ کیا ہے اور عددی اعتبار سے کم ہونے کے باوجود دشمن پر غالب آنے کی اپنی شاندار اور درخشندہ روایت کو قائم رکھا ہے۔