بجٹ 2026-27: پٹرولیم لیوی میں بڑے اضافے کی تجویز، ایل پی جی سمیت مختلف شعبے شامل

اسلام آباد: وفاقی حکومت نے آئندہ مالی سال 2026-27 کے بجٹ میں پٹرولیم لیوی کے ہدف میں نمایاں اضافے کی تجویز پیش کردی ہے جس کے تحت ایل پی جی سمیت مختلف شعبوں پر لیوی کے نئے اہداف مقرر کیے گئے ہیں۔

وفاقی وزیر خزانہ سینیٹر محمد اورنگزیب نے قومی اسمبلی میں بجٹ پیش کرتے ہوئے بتایا کہ حکومت نے پٹرولیم لیوی کے دائرہ کار اور محصولات میں اضافہ کرنے کا فیصلہ کیا ہے تاکہ مالی ضروریات پوری کی جاسکیں۔

انہوں نے کہا کہ آئندہ مالی سال میں ایل پی جی پر پٹرولیم لیوی کی مد میں 3 ارب 45 کروڑ روپے جمع کرنے کا ہدف مقرر کرنے کی تجویز دی گئی ہے۔

وزیر خزانہ کے مطابق کلائمیٹ سپورٹ لیوی کے تحت 50 ارب روپے جمع کرنے کا تخمینہ لگایا گیا ہے، جبکہ آف دی گرڈ کیپٹیو پاور پلانٹس پر لیوی کی مد میں 15 ارب 73 کروڑ روپے سے زائد وصولی کا ہدف مقرر کرنے کی تجویز بھی بجٹ کا حصہ ہے۔

حکومتی ذرائع کے مطابق ان اقدامات کا مقصد ریونیو میں اضافہ اور توانائی کے شعبے میں مالی نظم و ضبط کو بہتر بنانا ہے۔