ٹی 20 ورلڈ کپ: سپر ایٹ مرحلہ، پاکستان اور انگلینڈ آج مدمقابل ہوں گے

آئی سی سی ٹی 20 ورلڈ کپ کے سپر ایٹ مرحلے میں پاکستان کی قومی ٹیم آج اہم مقابلے میں انگلینڈ کے مدمقابل آئے گی۔ سیمی فائنل تک رسائی کی راہ ہموار کرنے کے لیے قومی ٹیم کو اس میچ میں کامیابی حاصل کرنا ناگزیر ہے۔

پاکستان کا گزشتہ میچ نیوزی لینڈ کے خلاف بارش کے باعث مکمل نہ ہو سکا تھا جس کے بعد دونوں ٹیموں کو ایک ایک پوائنٹ دے دیا گیا۔ دوسری جانب انگلینڈ نے میزبان سری لنکا کو یکطرفہ مقابلے کے بعد 51 رنز سے شکست دے کر دو پوائنٹس حاصل کر لیے تھے۔

پوائنٹس جدول کے مطابق ایک ایک میچ کے بعد پاکستان کے پاس ایک پوائنٹ ہے، جبکہ انگلینڈ دو پوائنٹس اور مثبت 2 اعشاریہ 55 کے بہتر رن ریٹ کے ساتھ مضبوط پوزیشن میں ہے۔

پاکستان اور انگلینڈ کے درمیان یہ اہم میچ پالیکیلے اسٹیڈیم میں پاکستانی وقت کے مطابق شام ساڑھے چھ بجے شروع ہوگا۔