وطن کی فضاؤں کے محافظ پوری قوم کا فخر، ملک بھر میں یوم فضائیہ آج منایا جارہا ہے

وطن عزیز کی فضاؤں کے محافظوں کو خراجِ تحسین پیش کرنے کے لیے ملک بھر میں آج یومِ فضائیہ قومی جذبے اور احترام کے ساتھ منایا جا رہا ہے۔ 1965ء کی جنگِ ستمبر میں پاک فضائیہ کے شاہینوں نے اپنی جرات، شجاعت اور پیشہ ورانہ مہارت سے وہ تاریخی داستانیں رقم کیں جو تاریخ کا سرفہرست باب ہیں۔ تعداد اور وسائل کے لحاظ سے کہیں بڑی بھارتی فضائیہ کے مقابلے میں پاک فضائیہ کے پائلٹوں نے اعلیٰ جنگی حکمت عملی سے دشمن کی عددی برتری کو خاک میں ملا دیا۔ اس جنگ میں ایئر کموڈور سجاد حیدر کی قیادت میں پٹھان کوٹ ایئربیس پر تباہ کن حملے سے دشمن کے متعدد طیارے زمین پر ہی تباہ کر دیے گئے، جبکہ سرگودھا کے محاذ پر اسکواڈرن لیڈر ایم ایم عالم نے محض ایک منٹ سے بھی کم وقت میں دشمن کے 5 جنگی طیارے گرانے کا عالمی ریکارڈ قائم کیا۔ حال ہی میں پیش آنے والے معرکہء حق میں بھی پاک فضائیہ نے روایتی دشمن کو چھ صفر سے ذلت آمیز شکست دے کر دنیا بھر میں اپنی فضائی برتری کا لوہا منوایا ہے۔