آئی پی پیزکو آئندہ کےلیے دفن کردیا، بجلی سستی کرنے جارہےہیں، اویس لغاری

وفاقی  وزیر توانائی  اویس لغاری  کا کہنا ہےکہ ہم بجلی اتنی سستی کرنے جا رہے ہیں کہ لوگ  بیٹری  میں  محفوظ کریں گے  اور  رات کو  استعمال  کر سکیں گے۔ حکومت نے آئی پی پیز کانظام ختم کردیاہے۔

لاہور کی نجی یونیورسٹی میں پاور کانفرنس سے ویڈیو خطاب میں اویس لغاری کا کہنا تھا کہ توانائی سیکٹرکی اصلاحات ملک کے لیے بہت اہم ہیں، آج کل سبسڈی کی بات ہو رہی ہے، ہم موقع  دے رہے ہیں، پرائیویٹ کمپنیاں آئیں اور  خود اسمارٹ میٹر لائیں۔

اویس لغاری کا کہنا تھا کہ  ہم نے آئی پی پیز کو آئندہ کے لیے دفن کر دیا ہے، حکومت آئی پی پیز کے کاروبار سے نکل گئی ہے، ہم مزید 10 ہزار میگا واٹ کے آئی پی پیز لگانے جا رہے تھے ان کو  روک دیا ہے۔

وفاقی وزیر کا کہنا تھا کہ صنعت اور  زراعت کے لیے بجلی کے نرخ مختلف ہوں گے، ہم بجلی کو اتنا سستا کرنے جا رہے ہیں کہ لوگ بیٹری میں محفوظ کریں گے اور  رات کو استعمال کرسکیں گے۔

ان کا کہنا تھا کہ میٹروں کی خریداری میں بچت کی گئی ہے،  اگلے ایک دو سال میں کمپنیاں پرائیویٹ ہو جائیں گی۔