11 سے 18 مئی ملک میں ممکنہ موسمی خطرات کے حوالے سے الرٹ جاری

نیشنل ڈیزاسٹر مینجمنٹ اتھارٹی (NDMA) کے نیشنل ایمرجنسیز آپریشن سینٹر (NEOC) نے 11 سے 18 مئی تک ملک بھر کے لیے موسم کی شدید صورتحال کا الرٹ جاری کر دیا ہے۔ الرٹ کے مطابق، ایک طرف جنوبی اور وسطی پاکستان شدید ہیٹ ویو کی لپیٹ میں رہے گا، تو دوسری طرف شمالی علاقوں میں بارشوں اور گلیشیئرز پگھلنے کے باعث سیلابی خطرات (GLOF) منڈلا رہے ہیں۔

ہیٹ ویو (12 تا 18 مئی): جنوبی پنجاب (ملتان، بہاولپور، رحیم یار خان)، زیریں سندھ (کراچی، حیدرآباد، سکھر) اور مشرقی بلوچستان میں 3 سے 5 روز تک شدید گرمی کا امکان ہے۔ شہریوں کو ہیٹ اسٹروک سے بچنے کے لیے زیادہ پانی پینے اور احتیاط کی ہدایت کی گئی ہے۔ پنجاب (بشمول اسلام آباد، لاہور، راولپنڈی)، خیبر پختونخوا، آزاد کشمیر اور گلگت بلتستان میں گرج چمک کے ساتھ بارش اور چند مقامات پر ژالہ باری متوقع ہے۔ تیز ہواؤں سے سولر پینلز اور کچی تعمیرات کو نقصان پہنچ سکتا ہے۔ شمالی علاقوں میں بڑھتے درجہ حرارت سے گلیشیئرز تیزی سے پگھلنے کا خدشہ ہے۔ ہنزہ، غذر، چترال اور اسکردو میں گلیشیائی جھیلیں پھٹنے، فلیش فلڈ اور لینڈ سلائیڈنگ کے شدید خطرات ہیں۔ این ڈی ایم اے نے ضلعی انتظامیہ کو کولنگ سینٹرز قائم کرنے اور ہیٹ ویو پلان فعال رکھنے کی ہدایت کی ہے۔ سیاحوں اور مقامی آبادی کو پہاڑی علاقوں میں غیر ضروری سفر اور گلیشیائی جھیلوں کے قریب جانے سے گریز کا مشورہ دیا گیا ہے۔

شہریوں کو تازہ ترین معلومات کے لیے ‘پاک این ڈی ایم اے ڈیزاسٹر الرٹ ایپ’ استعمال کرنے کی تاکید کی گئی ہے۔