بھارت کیخلاف کامیابی کے بعد دنیا پاکستان کی دفاعی طاقت سے آگاہ ہو چکی: مصطفیٰ کمال

وفاقی وزیر اور ایم کیو ایم پاکستان کے سینئر رہنما مصطفیٰ کمال نے یومِ دفاع کی ایک تقریب سے خطاب کرتے ہوئے کہا ہے کہ بھارت کے خلاف حالیہ کامیابی کے بعد دنیا اب پاکستان کی ناقابلِ تسخیر دفاعی صلاحیتوں سے مکمل طور پر آگاہ ہو چکی ہے۔ انہوں نے کہا کہ یومِ دفاع کا دن پاکستان سمیت دنیا بھر میں مقیم پاکستانی بھرپور ملی جوش و جذبے کے ساتھ منا رہے ہیں۔ پاک فوج کی پیشہ ورانہ مہارت کو سراہتے ہوئے مصطفیٰ کمال نے کہا کہ ہماری مسلح افواج نے چند ماہ قبل بھارت کو شکست فاش دے کر ایک بار پھر ثابت کیا کہ ملکی سرحدوں کا دفاع نہایت مضبوط اور محفوظ ہاتھوں میں ہے۔

انہوں نے مزید کہا کہ اس کامیابی کے بعد عالمی سطح پر خطے کے امن کے لیے پاکستان کے دفاع کی اہمیت کو تسلیم کیا جا رہا ہے، جبکہ سعودی عرب سمیت متعدد دوست ممالک آج پاکستان کے ساتھ دفاعی اور معاشی معاہدے کر رہے ہیں۔ وفاقی وزیر کا کہنا تھا کہ بھارت نے ہمیشہ اپنے منفی پروپیگنڈے سے پاکستان کو تنہا کرنے کی کوشش کی، لیکن مسلح افواج کی شجاعت نے پاکستان کو عالمی سطح پر امن کے ایک مضبوط پیامبر کے طور پر پیش کیا ہے، جس کی بدولت آج بین الاقوامی سطح پر سبز ہلالی پرچم اور گرین پاسپورٹ کو پہلے سے زیادہ احترام اور شناخت مل رہی ہے