مصطفیٰ کمال کی کراچی کے مسائل پر شدید تنقید، 27 ستمبر کو جلسے کا اعلان

ایم کیو ایم پاکستان کے رہنما و وفاقی وزیر مصطفیٰ کمال نے کراچی میں پانی، سیوریج اور بنیادی سہولیات کی ابتر صورتحال اور حکومتی نظام پر شدید تنقید کرتے ہوئے 27 ستمبر کو سہراب گوٹھ میں جلسے کا اعلان کر دیا ہے۔ میڈیا سے گفتگو کرتے ہوئے ان کا کہنا تھا کہ سندھ کو ملنے والے 22 ہزار ارب روپے کے باوجود عوام بنیادی سہولیات سے محروم ہیں، جبکہ کراچی کو 7 اضلاع میں تقسیم کر کے اس کا انتظامی ڈھانچہ تباہ کر دیا گیا ہے۔ مصطفیٰ کمال نے واضح کیا کہ ایم کیو ایم اب صرف کسی مخصوص علاقے کی نہیں بلکہ پورے کراچی کی نمائندہ جماعت ہے، اور نئے انتظامی یونٹس کی حمایت کرتی ہے۔ انہوں نے شہریوں سے اپنے حقوق کے لیے متحد ہو کر تحریک کا حصہ بننے کی اپیل کی اور بتایا کہ سہراب گوٹھ، کراچی اور حیدرآباد کے بعد لاڑکانہ میں بھی جلسہ کیا جائے گا۔