مرتضیٰ وہاب نے مصطفیٰ کمال کی باتیں غیر سنجیدہ قرار دے دیں

پیپلز پارٹی کے رہنما اور میئر کراچی مرتضیٰ وہاب نے ایم کیو ایم رہنما مصطفیٰ کمال کے حالیہ بیانات کو غیر سنجیدہ قرار دیتے ہوئے کہا ہے کہ وہ ان کی باتوں پر توجہ نہیں دیتے اور ایک کان سے سن کر دوسرے کان سے نکال دیتے ہیں۔ میڈیا سے گفتگو کرتے ہوئے مرتضیٰ وہاب کا کہنا تھا کہ پیپلز پارٹی نے کراچی کے تمام علاقوں میں بلا تفریق ترقیاتی کام شروع کیے ہیں اور شہر کی ترقی کا یہ سفر بلا تعطل جاری رہے گا۔ انہوں نے واضح کیا کہ نیا صوبہ بنانے سے متعلق فیصلے جلسوں یا بہادرآباد میں نہیں بلکہ اسمبلی کے اندر ہوتے ہیں۔ مصطفیٰ کمال کے اختیارات سے متعلق مطالبات کو ہدفِ تنقید بناتے ہوئے انہوں نے کہا کہ جب وہ خود عہدے پر نہیں ہوتے تو تمام اختیارات اسلام آباد بھیجنے کی باتیں کرتے ہیں۔ علاوہ ازیں، میئر کراچی نے بلاول بھٹو زرداری کی شادی یا منگنی کے حوالے سے گردش کرنے والی خبروں کو دوبارہ من گھڑت قرار دیتے ہوئے کہا کہ ان کی تاحال کوئی منگنی یا شادی طے نہیں ہوئی۔