بلاول بھٹو کی سربراہی میں کراچی کو آگے لے کر جائیں گے: مرتضیٰ وہاب

میئر کراچی بیرسٹر مرتضیٰ وہاب نے کہا ہے کہ پاکستان پیپلز پارٹی کے چیئرمین بلاول بھٹو زرداری کی قیادت میں کراچی شہر کو ترقی اور خوشحالی کی راہ پر آگے لے کر جائیں گے۔ کراچی میں میڈیا سے گفتگو کرتے ہوئے میئر کراچی نے کہا کہ ماضی میں جائز مطالبات کے لیے بھی سڑکوں پر بیٹھنا پڑتا تھا، لیکن پیپلز پارٹی کی عوامی حکومت آنے کے بعد شہریوں کو اپنے منتخب نمائندوں تک براہِ راست رسائی حاصل ہوئی ہے۔ انہوں نے پارٹی کارکنوں کو خراجِ تحسین پیش کرتے ہوئے کہا کہ طاقت کا حقیقی سرچشمہ صرف اور صرف عوام ہیں اور لوگ پیپلز پارٹی کی عوامی سوچ سے محبت کرتے ہیں۔

مرتضیٰ وہاب نے واضح کیا کہ بلدیہ عظمیٰ کراچی (کے ایم سی) اپنے فنڈز سے ترقیاتی منصوبوں پر کام کر رہی ہے اور جماعت میں اجتماعی سوچ کو ترجیح دی جاتی ہے۔ پاکستان تحریکِ انصاف پر تنقید کرتے ہوئے انہوں نے کہا کہ پی ٹی آئی نے اپنے دور میں کراچی کے لیے کچھ نہیں کیا۔ چیئرمین بلاول بھٹو زرداری کے حالیہ بیان کا حوالہ دیتے ہوئے انہوں نے کہا کہ بلاول بھٹو نے سندھ کا دورہ کرنے والے تمام سیاسی مہمانوں کو تہذیب اور جمہوری روایت کے تحت خوش آمدید کہا ہے۔