ماسکو فارمیٹ کا آٹھواں اجلاس، افغانستان کی صورتحال اور علاقائی سلامتی پر غور

ماسکو میں افغانستان سے متعلق ماسکو فارمیٹ مشاورت کا آٹھواں اجلاس منعقد ہوا جس میں پاکستان اور چین سمیت خطے کے مختلف ممالک کے نمائندوں نے شرکت کی۔ اجلاس کے دوران افغانستان کی موجودہ صورتحال، علاقائی امن و سلامتی اور دہشتگردی کے خلاف اقدامات پر تفصیلی تبادلہ خیال کیا گیا۔ روسی وزیر خارجہ سرگئی لاوروف نے اجلاس سے خطاب کرتے ہوئے کہا کہ روس افغانستان کو انسانی امداد کی فراہمی جاری رکھے گا، تاہم افغانستان میں نیٹو کے فوجی انفراسٹرکچر کی تعیناتی ہرگز قبول نہیں کیونکہ یہ خطے میں عدم استحکام اور تنازعات میں اضافے کا سبب بن سکتی ہے۔