ایران جنگ سے ہر امریکی گھرانے کو اوسطاً 2 ہزار ڈالر کا نقصان پہنچا، موڈیز

عالمی مالیاتی و معاشی تجزیاتی ادارے ‘موڈیز’ (Moody’s) کی تازہ ترین رپورٹ میں انکشاف کیا گیا ہے کہ ایران کے ساتھ جاری عسکری کشیدگی اور جنگی اخراجات کے باعث امریکی صارفین کو مجموعی طور پر 265 ارب ڈالر کا بڑا مالی نقصان برداشت کرنا پڑا ہے، جس سے فی امریکی گھرانے پر اوسطاً 2 ہزار ڈالر کا اضافی معاشی بوجھ آن پڑا ہے۔

موڈیز کے معاشی تجزیے کے مطابق، جنگ کے اثرات اور بین الاقوامی مارکیٹ میں ایندھن و توانائی کی قیمتوں میں ہونے والے ہوشربا اضافے نے امریکی گھرانوں کی آمدنی میں متوقع سالانہ اضافے کا تقریباً نصف حصہ نگل لیا ہے۔ توانائی اور پیٹرولیم مصنوعات مہنگی ہونے کے باعث عام شہریوں کے گھریلو بجٹ پر شدید دباؤ پڑا ہے، جس کے اثرات براہِ راست دیگر ضروری اشیائے خوردونوش اور خدمات (Services) کی قیمتوں پر بھی نمایاں نظر آ رہے ہیں۔

رپورٹ میں مزید کہا گیا ہے کہ عام امریکی شہریوں کی جیب پر پڑنے والے ان ہی بھاری اقتصادی اثرات اور مسلسل بڑھتے ہوئے اخراجات کی وجہ سے امریکی عوام کے اندر اس جنگ کی مقبولیت میں شدید کمی آئی ہے اور حکومت کی پالیسیوں پر اندرونی معاشی دباؤ مسلسل بڑھ رہا ہے