محسن نقوی کا راول ڈیم کے تحفظ کیلئے سیوریج ٹریٹمنٹ پلانٹس لگانے کا فیصلہ

وفاقی وزیر داخلہ محسن نقوی اور وزیر مملکت طلال چوہدری کی زیرِ صدارت منعقدہ ایک خصوصی اجلاس میں وفاقی دارالحکومت کے اہم آبی ذخیرے، راول ڈیم کے تحفظ کے لیے بڑے فیصلے کیے گئے ہیں۔ اجلاس میں ڈیم میں گرنے والے نالوں پر سیوریج ٹریٹمنٹ پلانٹس کی تنصیب کی تجاویز کا جائزہ لیا گیا۔ وزیر داخلہ کا کہنا تھا کہ ان پلانٹس کی مدد سے شہریوں کو صاف اور محفوظ پانی کی فراہمی یقینی بنائی جا سکے گی۔ انہوں نے انتظامیہ کو دوٹوک ہدایت کی کہ اسلام آباد میں قبضہ مافیا اور غیر قانونی تعمیرات کے خلاف بلا امتیاز آپریشن کلین اپ جاری رکھا جائے اور اسے منطقی انجام تک پہنچایا جائے۔

اجلاس کے دوران پارلیمنٹ لاجز کے نئے بلاک پر کام کی رفتار کا معائنہ بھی کیا گیا، جس پر محسن نقوی نے اسے 30 جون تک مکمل کرنے کی ڈیڈ لائن دے دی۔ اس کے علاوہ، کیپیٹل پولیس کالج کی اپ گریڈیشن کے منصوبے پر بھی غور کیا گیا، جس کے تحت زیرِ تربیت اہلکاروں کے لیے نئے کلاس رومز، میس اور بیرکس تعمیر کی جائیں گی۔ اجلاس میں اسلام آباد کے دیگر ترقیاتی منصوبوں پر پیش رفت کا بھی تفصیلی جائزہ لیا گیا اور حکام نے وزراء کو مختلف پروجیکٹس پر بریفنگ دی۔