مولانا فضل الرحمٰن کی لاہور آمد، سیاسی صورتحال اور صوبوں کے معاملات پر گفتگو

لاہور: جمعیت علمائے اسلام (جے یو آئی) کے سربراہ مولانا فضل الرحمٰن نے کہا ہے کہ ملک میں امن و امان کی صورتحال انتہائی تشویشناک ہو چکی ہے اور تین صوبوں میں حکومت کی عملی رٹ ختم ہو کر رہ گئی ہے۔

لاہور آمد کے موقع پر سینئر صحافی مجیب الرحمٰن شامی کی جانب سے دی گئی دعوتِ طعام میں شرکت کے بعد گفتگو کرتے ہوئے جے یو آئی سربراہ نے ملکی سیاسی و اقتصادی صورتحال پر تفصیلی اظہارِ خیال کیا۔ اس موقع پر سینئر اینکر پرسنز سہیل وڑائچ، سلمان غنی، منصور علی خان اور دیگر صحافی بھی موجود تھے۔

مولانا فضل الرحمٰن نے این ایف سی ایوارڈ کے حوالے سے صوبائی تحفظات پر بات کرتے ہوئے کہا کہ صوبوں کا بنیادی مسئلہ این ایف سی کا ہے، جبکہ آئینی طور پر این ایف سی حصص میں اضافہ تو ہو سکتا ہے لیکن کمی کی کوئی گنجائش نہیں ہے۔ انہوں نے تنقید کرتے ہوئے کہا کہ وفاق صوبوں کے معدنی وسائل پر قبضہ کرنا چاہتا ہے، حالانکہ جب ملک یا گھر میں آگ لگی ہو تو اس وقت تقسیم کی باتیں نہیں ہونی چاہئیں۔

پاکستان تحریک انصاف (پی ٹی آئی) کے ساتھ تعلقات اور اتحاد کی وضاحت کرتے ہوئے جے یو آئی سربراہ نے واضح کیا کہ پی ٹی آئی کے ساتھ تعاون فی الحال صرف پارلیمانی حد تک محدود ہے اور اسے گراؤنڈ لیول یا عوامی سطح کا سیاسی اتحاد نہیں کہا جا سکتا۔