مسجد الاقصیٰ کو 40 دن بند رکھنے کے بعد کھول دیا گیا

مقبوضہ بیت المقدس میں اسرائیلی حکام نے مسجدِ اقصیٰ کو 40 دن کی طویل بندش کے بعد دوبارہ کھولنے کا اعلان کر دیا ہے، جس کے بعد صبح سویرے نمازیوں کی ایک بڑی تعداد نے مسجد کا رخ کیا۔ رپورٹ کے مطابق، اسرائیلی حکام نے مسجدِ اقصیٰ سمیت بیت المقدس کے دیگر مقدس مقامات کو بھی آج صبح سے زائرین اور نمازیوں کے لیے کھول دیا ہے۔ مسجد کے دروازے کھلتے ہی وہاں جذباتی مناظر دیکھنے میں آئے اور شہریوں نے بڑی تعداد میں فجر کی نماز ادا کی۔

واضح رہے کہ اسرائیل نے ایران کے ساتھ حالیہ جنگ کے آغاز پر سیکیورٹی وجوہات کو جواز بنا کر مقبوضہ بیت المقدس میں تمام مقدس مقامات کو مکمل طور پر بند کر دیا تھا، جس کی وجہ سے فلسطینیوں اور دیگر زائرین کو شدید مشکلات کا سامنا کرنا پڑ رہا تھا۔ اب جنگ بندی کے بعد حالات معمول پر لانے کے لیے ان مقامات کو دوبارہ کھولا گیا ہے۔ اگرچہ صورتحال تاحال کشیدہ ہے، تاہم مقدس مقامات کی بحالی کو خطے میں مذہبی سرگرمیوں کی واپسی کے حوالے سے ایک اہم قدم قرار دیا جا رہا ہے۔