وزیر اعلیٰ پنجاب کا اضلاع کو خودمختار بنانے کا فیصلہ، ترقیاتی منصوبے شروع

وزیراعلیٰ پنجاب مریم نواز شریف نے “جس ضلع کا ریونیو، اسی کی ترقی” کے وژن کے تحت پنجاب کے اضلاع کو مالی طور پر خودمختار بنانے کے لیے مقامی وسائل سے اربوں روپے کے ترقیاتی منصوبوں کا اعلان کر دیا ہے۔ کمشنرز کے اہم اجلاس کی صدارت کرتے ہوئے وزیراعلیٰ نے واضح کیا کہ انہیں اب صرف “گراؤنڈ ورک” چاہیے، “آئی واش” نہیں۔ انہوں نے افسران کو دفاتر چھوڑ کر فیلڈ میں نکلنے کی ہدایت کرتے ہوئے کہا کہ اگر انتظامیہ کے پاس اختیار ہے تو ذمہ داری بھی اسی کی ہوگی۔ فیصل آباد میں بچی کے جاں بحق ہونے کے واقعے پر برہمی کا اظہار کرتے ہوئے انہوں نے حکم دیا کہ کھلے مین ہول پر متعلقہ سوسائٹی مالکان کو گرفتار کیا جائے۔

منصوبوں کی تفصیلات کے مطابق ساہیوال ڈویژن کے لیے 4 ارب روپے کے فنڈز سے سڑکوں کی تعمیر و مرمت ستمبر 2026 تک مکمل کرنے کا ہدف دیا گیا ہے۔ سرگودھا ڈویژن میں 2.8 ارب روپے سے بیوٹیفکیشن اور انفراسٹرکچر کے منصوبے منظور کیے گئے ہیں، جبکہ فیصل آباد میں 5.3 ارب روپے کے مقامی وسائل سے 59 اسکیموں بشمول 38 اہم سڑکوں پر کام ہوگا۔ ملتان ڈویژن کے چار اضلاع میں بھی 3 ارب روپے کی لاگت سے 28 اسکیمیں مکمل کی جائیں گی۔ وزیراعلیٰ نے دوٹوک الفاظ میں کہا کہ پنجاب بھر میں ترقیاتی کاموں کا معیار یکساں ہوگا اور کسی قسم کی اقربا پروری یا سفارش کے بجائے صرف میرٹ پر کام کیا جائے گا۔