وزیراعلیٰ مریم نواز شریف کا پاک بحریہ کے افسران اور جوانوں کو خراجِ تحسین

وزیراعلیٰ پنجاب مریم نواز شریف نے 8 ستمبر یومِ بحریہ کے تاریخی موقع پر اپنے خصوصی پیغام میں سمندری حدود کے فولادی دفاع اور ملکی سلامتی کے لیے گرانقدر خدمات انجام دینے والے پاک بحریہ کے افسران، جوانوں، شہداء اور غازیوں کو زبردست خراجِ تحسین پیش کیا ہے۔ انہوں نے کہا کہ پاکستان نیوی نے ہر عسکری و بحری امتحان میں اپنی اعلیٰ اور شاندار پیشہ ورانہ صلاحیتوں کا لوہا منوا کر دشمن پر اپنی واضح برتری ثابت کی ہے۔ وزیراعلیٰ نے 1965ء کی جنگ کے تاریخی آپریشن کا ذکر کرتے ہوئے کہا کہ 8 ستمبر کو پاک بحریہ نے شاندار فتح حاصل کی، جبکہ بحرِ ہند میں پاک بحریہ کی نامور آبدوز ‘غازی’ نے عسکری و بحری جنگ کی تاریخ کا ایک سنہرا باب رقم کیا۔

مریم نواز شریف نے پاک بحریہ کے وسیع تر تزویراتی کردار کو سراہتے ہوئے کہا کہ پاک بحریہ نہ صرف ملکی سمندری حدود کی نگہبانی کر رہی ہے بلکہ بین الاقوامی بحری تجارت کے فروغ اور تحفظ میں بھی اہم ترین فریضہ سرانجام دے رہی ہے۔ انہوں نے کہا کہ موجودہ عالمی اور علاقائی حالات میں آبنائے ہرمز پر شدید کشیدگی کے باوجود پاکستانی پرچم بردار تجارتی بحری جہازوں اور آئل ٹینکرز کی بلا تعطل اور محفوظ آمدورفت کو یقینی بنانا پاک بحریہ کا انتہائی قابلِ تحسین کارنامہ ہے۔ وزیراعلیٰ پنجاب نے مزید کہا کہ جدید ترین آبدوزوں، میلجم کارویٹس، کروز اور بیلسٹک میزائلوں سے لیس پاک بحریہ دنیا بھر میں ایک مضبوط ترین محافظ طاقت بن چکی ہے اور اپنی بحری سفارت کاری کے ذریعے عالمی برادری میں پاکستان کا وقار بلند کر رہی ہے