وزیراعلیٰ کی دہشتگردی کیخلاف گفتگو منفی انداز میں پیش کرنا افسوسناک: مریم اورنگزیب

سینئر صوبائی وزیر پنجاب مریم اورنگزیب نے کہا ہے کہ وزیراعلیٰ پنجاب مریم نواز شریف کی دہشت گردی کے خلاف اقدامات کے حوالے سے گفتگو کو سوشل میڈیا پر منفی انداز میں پیش کرنا انتہائی افسوسناک اور قابلِ مذمت ہے۔ سماجی رابطے کی ویب سائٹ ‘ایکس’ (سابقہ ٹوئٹر) پر جاری اپنے بیان میں مریم اورنگزیب نے وضاحت کی کہ وزیراعلیٰ نے محض دہشت گردوں کی بین الصوبائی نقل و حرکت اور اس سے پیدا ہونے والے امن و امان کے خطرات پر بات کی تھی، مگر سیاسی حاسدین نے دانستہ طور پر گفتگو کے اصل تناظر کو مسخ کر کے اسے صوبائیت اور لسانیت کا رنگ دینے کی کوشش کی۔ انہوں نے زور دے کر کہا کہ مریم نواز شریف تمام صوبوں اور ان میں بسنے والی تمام اقوام کا بے حد احترام کرتی ہیں اور انسدادِ دہشت گردی جیسے اہم قومی معاملے کو صوبائیت سے جوڑنا ایک گھٹیا عمل ہے۔ سینئر صوبائی وزیر نے مزید کہا کہ سیاسی نمبر اسکورنگ کے لیے قوم میں تفریق پیدا کرنا اور دہشت گردی کے خلاف اقدامات کو متنازع بنانا قومی مفاد کے خلاف ہے۔