دہشتگردی کی کوشش ناکام بنانے والے شہری لیاقت شہید کیلئے ستارۂ شجاعت کا اعلان

اپنی جان پر کھیل کر خودکش دہشت گرد کو روکنے اور سینکڑوں قیمتی جانیں بچانے والے بہادر شہری لیاقت شہید ولد کریم الہٰی کی عظیم قربانی کا قومی سطح پر اعتراف کر لیا گیا ہے۔ وزیراعظم کی خصوصی سفارش پر صدر مملکت آصف علی زرداری نے لیاقت شہید کے لیے پاکستان کے دوسرے بڑے سول اعزاز برائے بہادری ‘ستارۂ شجاعت’ کی منظوری دے دی ہے۔ لیاقت شہید نے بے مثال جرأت اور فرض شناسی کا مظاہرہ کرتے ہوئے خودکش حملہ آور کے ناپاک عزائم کو خاک میں ملا دیا تھا، جو اب دہشت گردی کے خلاف قوم کے غیر متزلزل عزم کی علامت بن چکے ہیں۔

ایوانِ صدر میں منعقد ہونے والی تقریب میں شرکت کے لیے لیاقت شہید کی والدہ، صاحبزادے اور بھائی مکمل سرکاری پروٹوکول اور ایلیٹ فورس کی سیکیورٹی میں اسلام آباد روانہ ہو گئے ہیں۔ اے سی جنڈ بھی اہل خانہ کے ہمراہ ہیں، جو آج شام صدرِ پاکستان سے یہ وقارِ ملت اعزاز وصول کریں گے۔ حکومت اور پوری قوم اپنے اس بہادر سپوت کی قربانی کو خراجِ عقیدت پیش کرتی ہے، جس نے اپنی جان دے کر انسانیت کی بقا کی روشن مثال قائم کی۔