اسرائیلی جارحیت رکوانے کےلیے مددکی جائے، لبنان کے وزیراعظم کی اپیل

لبنان کے وزیرِ اعظم نے اسرائیلی فضائی حملوں کی بڑی لہر کے بعد لبنان کے تمام دوست ممالک سے اپیل کی ہے کہ وہ اسرائیلی جارحیت کوتمام دستیاب ذرائع سےرکوانے میں مدد کریں۔

سوشل میڈیاپر بیان میں لبنانی وزیر اعظم نواف سلام نے کہا کہ اسرائیل اپنی جارحیت کا دائرہ مسلسل وسیع کر رہا ہے، جس کے تحت گنجان آباد رہائشی علاقوں کو نشانہ بنایا جا رہا ہے، اور لبنان کے مختلف حصوں، بالخصوص دارالحکومت بیروت میں، نہتے شہری شہید ہورہے ہیں۔

لبنانی وزیراعظم کی  یہ اپیل اسرائیلی ڈیفنس فورسزکے اس بیان کے بعد سامنے آئی ہے جس میں کہا گیا تھا کہ اس نے حزب اللہ کے خلاف اپنی کارروائی کے آغاز کے بعد لبنان بھر میں سب سے بڑے حملے کیے ہیں۔

نواف سلام نے کہا کہ اسرائیلی فوج کی کارروائیوں سے بین الاقوامی قانون کے لیے مکمل لاپروائی کا اظہار ہوتا ہے۔ انہوں نے مزید کہا کہ لبنان کے تمام دوستوں سے مطالبہ کیا جاتا ہے کہ وہ اس جارحیت کو روکنے کے لیے ہر دستیاب ذریعے سے ہماری مدد کریں۔