اقوام متحدہ، یورپ کا لبنان جنگ بندی کا خیر مقدم، اسرائیل کی جانب سے خلاف ورزیاں

لبنان میں جنگ بندی کے باقاعدہ آغاز کے فوری بعد لبنانی فوج نے اسرائیل پر معاہدے کی خلاف ورزی کا الزام عائد کر دیا ہے، جس کے باعث جنوبی لبنان کے سرحدی علاقوں میں صورتحال بدستور کشیدہ ہے۔

لبنانی فوج کے مطابق جمعہ کی رات سے نافذ ہونے والی جنگ بندی کے باوجود اسرائیل کی جانب سے متعدد جارحانہ اقدامات ریکارڈ کیے گئے ہیں۔ بیان میں کہا گیا ہے کہ جنوبی لبنان کے مختلف دیہات پر وقفے وقفے سے گولہ باری کی گئی، جس کے پیشِ نظر فوج نے شہریوں کو ہدایت کی ہے کہ وہ فی الحال اپنے گھروں کو واپسی کا فیصلہ مؤخر کر دیں۔ دوسری جانب امریکی نشریاتی ادارے سی این این کے رابطے کے باوجود اسرائیلی فوج نے تاحال ان الزامات پر کوئی ردعمل ظاہر نہیں کیا۔

دوسری جانب عالمی سطح پر اس جنگ بندی کا خیرمقدم کیا جا رہا ہے۔ اقوام متحدہ کے سیکرٹری جنرل انتونیو گوتریس نے معاہدے کو خوش آئند قرار دیتے ہوئے اس میں امریکی کردار کی تعریف کی ہے۔ انہوں نے امید ظاہر کی کہ یہ وقفہ خطے میں طویل المدتی امن اور پائیدار حل کے لیے مذاکرات کی راہ ہموار کرے گا۔ اسی طرح یورپی کمیشن کی نائب صدر کایا کالاس نے کہا کہ یہ معاہدہ متاثرہ شہریوں تک انسانی امداد پہنچانے کا ایک اہم موقع ہے، جس سے حالیہ ہفتوں کی شدید مشکلات کو کم کرنے میں مدد ملے گی۔