روس کا جوہری ہتھیار استعمال کرنے کا کوئی ارادہ نہیں، کریملن

کریملن نے واضح کیا ہے کہ روس کا جوہری ہتھیار استعمال کرنے کا نہ تو کوئی منصوبہ ہے اور نہ ہی ایسا کوئی ارادہ رکھتا ہے۔ روسی صدارتی ترجمان دیمتری پیسکوف (Dmitry Peskov) نے غیر ملکی میڈیا سے گفتگو کے دوران روس کی جانب سے جوہری ہتھیاروں کے ممکنہ استعمال سے متعلق مغربی ذرائع ابلاغ میں گردش کرنے والی تمام تر قیاس آرائیوں کو یکسر مسترد کر دیا۔

صحافیوں کے سوال کا جواب دیتے ہوئے صدارتی ترجمان نے زور دے کر کہا کہ روس کی جانب سے جوہری ہتھیاروں کے استعمال پر غور کیے جانے کی خبروں میں کوئی سچائی نہیں ہے۔ انہوں نے کہا کہ روس کے بجائے خود یورپی ممالک بلاوجہ اس معاملے کو ہوا دے رہے ہیں جس سے یورپ میں خوف، ہیجان اور سراسیمگی کی فضا پیدا کی جا رہی ہے۔ دیمتری پیسکوف نے یورپی رہنماؤں اور ممالک پر زور دیا کہ وہ جذباتی بیانات اور ہیجان انگیزی سے گریز کرتے ہوئے موجودہ سیاسی صورتِ حال کا غیر جانبدارانہ، معروضی اور حقیقت پسندانہ نظر سے جائزہ لیں۔