خیبرپختونخوا کا ٹرانسپورٹ نظام بحران کا شکار، بدانتظامی کے سنگین انکشافات

خیبر پختونخوا کے محکمہ ٹرانسپورٹ کے حوالے سے سامنے آنے والی نئی سرکاری دستاویزات نے صوبائی ٹرانسپورٹ نظام کی زبوں حالی اور شدید انتظامی بحران کو بے نقاب کر دیا ہے۔ رپورٹ کے مطابق محکمے میں جدید منصوبہ بندی، یکجا مرکزی ڈیٹا بیس اور سائنسی فریم ورک کے فقدان کی وجہ سے صوبے بھر میں پبلک ٹرانسپورٹ کا بنیادی ڈھانچہ مفلوج ہو کر رہ گیا ہے۔ دستاویزات کے مطابق پراونشل ٹرانسپورٹ اتھارٹی (PTA)، ریجنل ٹرانسپورٹ اتھارٹی (RTA)، خیبرپختونخوا اربن موبیلٹی اتھارٹی (KPUMA) اور ٹرانسپورٹ ڈائریکٹوریٹ جیسے اہم ذیلی اداروں کے درمیان باہمی رابطہ کاری نہ ہونے سے جہاں فیصلے معطل ہیں، وہیں مسافروں کے لیے سفری مشکلات اور سڑکوں کی تحفظ کے حوالے سے سنگین سوالات جنم لے رہے ہیں۔