سندھ کے عوام نے فسطائیت کا جس طرح مقابلہ کیا، انہیں سلام پیش کرتا ہوں: سہیل آفریدی

کراچی: وزیراعلیٰ خیبر پختونخوا سہیل آفریدی نے سندھ ہائیکورٹ بار ایسوسی ایشن کے کنونشن سے خطاب کرتے ہوئے سندھ کے عوام کی مہمان نوازی اور سیاسی جدوجہد کو خراجِ تحسین پیش کیا اور صوبائی حکومت کی انتظامی پابندیوں، راستوں کی بندش اور سیاسی انتقام کو شدید تنقید کا نشانہ بنایا۔

سہیل آفریدی نے کہا کہ سندھ کے عوام نے جس دلیری سے فسطائیت اور ظلم کا سامنا کیا ہے، وہ قابلِ تحسین ہے۔ انہوں نے بلاول بھٹو زرداری اور پیپلز پارٹی کی حکومت پر منافقت کا الزام عائد کرتے ہوئے کہا کہ ایک طرف خوش آمدید کے دعوے کیے جاتے ہیں اور دوسری طرف راستوں میں کنٹینرز رکھ کر گڑھے کھودے جاتے ہیں اور خواتین و سیاسی کارکنوں کو گرفتار کیا جاتا ہے۔ ان کا کہنا تھا کہ ملک میں قائم موجودہ اسمبلیاں اور حکومتیں عوامی مینڈیٹ کے بجائے جعلی فارم 47 کے ذریعے مسلط کی گئی ہیں، اور اگر حکمران حقیقی جمہوریت چاہتے ہیں تو صدر، چیئرمین سینیٹ اور گورنرز کے عہدوں سے استعفے دیں۔

وزیراعلیٰ خیبر پختونخوا نے عدالتی احکامات کی عدم تعمیل اور آئینی بحران پر تشویش کا اظہار کرتے ہوئے کہا کہ قانون صرف کمزوروں کے لیے رہ گیا ہے، جبکہ اسلام آباد ہائیکورٹ اور سپریم کورٹ کے احکامات کو جیل انتظامیہ ردی کی ٹوکری میں پھینک دیتی ہے۔ انہوں نے وکلاء برادری پر زور دیا کہ وہ آئین کی بالادستی اور قانون کی حکمرانی کے لیے آگے بڑھیں، عوام ان کے ساتھ کھڑی ہوگی۔