قزاقوں کے ہاتھوں یرغمال پاکستانیوں کے اہلخانہ پر پولیس کا دھاوا، 11 افراد گرفتاری کے بعد رہا

کراچی: صومالیہ میں بحری قزاقوں کے ہاتھوں یرغمال بنائے گئے پاکستانی شہریوں کے اہلخانہ کی جانب سے کراچی میں شارع فیصل پر قائم وزارتِ خارجہ کے کیمپ آفس کے باہر جاری دھرنے پر پولیس نے کریک ڈاؤن کرتے ہوئے متعدد مظاہرین کو حراست میں لے لیا، جنہیں بعد ازاں رہا کر دیا گیا۔

متاثرہ خاندان گزشتہ رات سے وزارتِ خارجہ کے دفتر کے باہر اپنے پیاروں کی باحفاظت بازیابی کے لیے دھرنا دیے ہوئے تھے اور انہوں نے صبح سے بھوک ہڑتال شروع کرنے کا اعلان کر رکھا تھا۔ پولیس نے احتجاج ختم کرانے کے لیے شارع فیصل پر کارروائی کرتے ہوئے دھرنے میں موجود 6 مردوں اور 5 خواتین سمیت 11 مظاہرین کو گرفتار کر کے ٹیپو سلطان پولیس اسٹیشن منتقل کر دیا۔

کریک ڈاؤن کے بعد دیگر متاثرہ فیملیز اور شہری بڑی تعداد میں ٹیپو سلطان تھانے پہنچ گئے اور زیرِ حراست افراد کی فوری رہائی کا مطالبہ کیا۔ شدید عوامی احتجاج اور مذاکرات کے بعد پولیس نے حراست میں لیے گئے تمام 11 مظاہرین کو رہا کر دیا اور ان کا قبضے میں لیا گیا سامان بھی واپس کر دیا۔ متاثرہ خاندانوں نے حکومت اور وزارتِ خارجہ سے مطالبہ کیا ہے کہ صومالیہ میں محصور پاکستانیوں کی فوری بازیابی کے لیے سفارتی سطح پر جاندار اقدامات کیے جائیں۔