کندھ کوٹ میں مسافر کوچ الٹ گئی،6 افراد جاں بحق، متعدد زخمی

اندرونِ سندھ کے علاقے کندھ کوٹ میں انڈس ہائی وے پر صیفل کے مقام پر مسافر کوچ الٹنے سے تبلیغی جماعت کے 6 افراد جاں بحق اور متعدد زخمی ہو گئے ہیں۔ ریسکیو ذرائع کے مطابق افسوسناک حادثہ تیز رفتاری کے باعث پیش آیا، جہاں ڈرائیور سے بے قابو ہو کر مسافر کوچ الٹ گئی۔ حادثے کی اطلاع ملتے ہی پولیس اور ریسکیو ٹیموں نے جائے وقوعہ پر پہنچ کر امدادی کارروائیاں شروع کیں اور لاشوں و زخمیوں کو مقامی ہسپتال منتقل کیا، جہاں ہنگامی بنیادوں پر ایمرجنسی نافذ کر دی گئی ہے۔ جاں بحق ہونے والے افراد کی شناخت بیدل مغیری، نور محمد، حامد پہوڑ، امین سرکی، فیض محمد اور غلام سرور کے نام سے ہوئی ہے، جبکہ زخمیوں میں عبدالستار، غلام یاسین، عبدالفتاح، عبدالحق، بابن اور محبوب علی شامل ہیں۔ پولیس حکام کا کہنا ہے کہ حادثے کا شکار ہونے والی مسافر کوچ ٹھل سے تبلیغی جماعت کے افراد کو لے کر لاہور جا رہی تھی۔ رات کے اندھیرے کے باعث ریسکیو ٹیموں کو امدادی آپریشن میں شدید مشکلات کا سامنا کرنا پڑا۔