جماعت اسلامی کی پٹرولیم لیوی اور مہنگائی کے خلاف آج ملک گیر ہڑتال

جماعت اسلامی نے پٹرولیم لیوی اور بڑھتی ہوئی مہنگائی کے خلاف آج ملک گیر ہڑتال کا اعلان کیا ہے۔ لاہور میں دھرنے سے خطاب کرتے ہوئے امیر جماعت اسلامی حافظ نعیم الرحمان نے حکومت کو تنقید کا نشانہ بناتے ہوئے کہا کہ حکمرانوں نے تمام بوجھ عوام پر ڈال دیا ہے جبکہ وزراء اور سرکاری افسران کی مفت بجلی، پٹرول اور بڑی گاڑیاں اب بھی برقرار ہیں۔ انہوں نے کہا کہ آج کی ہڑتال کے بعد آئندہ کے لائحہ عمل کا اعلان کیا جائے گا۔ دوسری جانب حکومتی کمیٹی، وفاقی وزیر احسن اقبال کی قیادت میں، آج دوپہر 3 بجے منصورہ میں جماعت اسلامی کی قیادت سے دھرنا ختم کروانے اور ان کے مطالبات پر مذاکرات کرے گی۔ احسن اقبال کا کہنا تھا کہ حکومت نیک نیتی کے ساتھ مسائل کا حل نکالنے اور ملک میں معاشی استحکام قائم رکھنے کے لیے مذاکرات کی میز پر جا رہی ہے۔