اسلام آباد کا نیا انتظامی نقشہ وزیراعظم کو پیش،27 رکنی اسمبلی اورچیف ایگزیکٹو بارے تجاویز شامل

وفاقی دارالحکومت اسلام آباد کو ایک نئے انتظامی اور گورننس ماڈل میں ڈھالنے کے لیے اہم پیش رفت سامنے آئی ہے۔ اعلیٰ سطح کی خصوصی کمیٹی نے وزیراعظم کو ایک جامع ڈرافٹ پیش کیا ہے جس میں اسلام آباد کو صوبائی طرز کی انتظامی و مالی خودمختاری دینے، 27 رکنی کیپیٹل ٹیریٹری اسمبلی قائم کرنے اور ایک منتخب چیف ایگزیکٹو (میئر یا وزیراعلیٰ) کی تعیناتی کی سفارش کی گئی ہے۔ ڈرافٹ کے مطابق اسمبلی کی 21 نشستوں پر الیکشن کمیشن کے تحت براہِ راست انتخابات ہوں گے، جبکہ 5 نشستیں خواتین اور 1 اقلیتوں کے لیے مخصوص ہو گی۔ اس نئے نظام کے تحت سی ڈی اے (CDA) اور لوکل گورنمنٹ کے تمام اختیارات، صحت، تعلیم اور شہری سہولیات جیسے 27 انتظامی محکمے نئی حکومت کے سپرد کرنے کی تجویز ہے، جبکہ قانون و امن اور ماسٹر پلاننگ کا کنٹرول وفاق کے پاس ہی رہے گا۔ اس سفارشاتی خاکے کی تیاری میں وفاقی وزرا احسن اقبال، محسن نقوی، رانا ثناء اللہ، مصدق ملک اور دیگر سینئر انتظامی و قانون ساز حکام نے اہم کردار ادا کیا ہے۔