وزیرخارجہ و نائب وزیراعظم اسحاق ڈار قاہرہ روانہ

اسلام آباد: نائب وزیراعظم اور وفاقی وزیر خارجہ سینیٹر محمد اسحاق ڈار ایک اہم سفارتی دورے پر مصر کے دارالحکومت قاہرہ روانہ ہو گئے ہیں۔ ترجمان دفتر خارجہ کے مطابق، اسحاق ڈار قاہرہ میں منعقد ہونے والے ‘آر فور’ (R4) گروپ کے چوتھے وزرائے خارجہ اجلاس میں پاکستان کی نمائندگی کریں گے۔ پاکستان، سعودی عرب، ترکیہ اور مصر پر مشتمل اس چار ملکی گروپ کے اجلاس میں باہمی دلچسپی کے اہم علاقائی و بین الاقوامی امور اور علاقائی سلامتی کی مجموعی صورتحال پر تفصیلی تبادلہ خیال کیا جائے گا۔

اپنے اس دورے کے دوران نائب وزیراعظم و وزیر خارجہ اجلاس کی سائیڈ لائنز پر شریک ممالک کے اپنے ہم منصب وزرائے خارجہ سے الگ الگ دوطرفہ ملاقاتیں بھی کریں گے۔ علاوہ ازیں، سینیٹر اسحاق ڈار کی مصر کے صدر عبدالفتاح السیسی سے بھی ایک اہم ملاقات شیڈول ہے، جس میں پاکستان اور مصر کے مابین دوطرفہ تعلقات کی مضبوطی، خطے کی حالیہ پیش رفت اور مختلف شعبوں میں باہمی تعاون کے فروغ سمیت اہم تزویراتی امور پر بات چیت متوقع ہے۔