اسحاق ڈار کی ترک وزیر خارجہ سے ملاقات، دوطرفہ تعلقات مزید مستحکم کرنے پر اتفاق

پاکستان کے نائب وزیراعظم و وزیرِ خارجہ سینیٹر محمد اسحاق ڈار نے استنبول میں ترکیہ کے وزیرِ خارجہ ہاکان فیدان سے اہم ملاقات کی، جس میں دونوں ممالک کے درمیان سیاسی، اقتصادی، سکیورٹی اور ثقافتی شعبوں میں دوطرفہ تعلقات کی مسلسل وسعت پر اطمینان کا اظہار کیا گیا۔ ترجمان دفترِ خارجہ کے مطابق دونوں رہنماؤں نے پاک-ترکیہ اعلیٰ سطحی اسٹریٹجک تعاون کونسل کے فریم ورک کی پیش رفت کا خیرمقدم کرتے ہوئے اس کا آئندہ اجلاس جلد منعقد کرنے پر اتفاق کیا۔ ملاقات میں علاقائی و بین الاقوامی امور سمیت خطے میں امن و استحکام کے لیے مشترکہ کوششیں جاری رکھنے کا عزم کیا گیا۔ علاوہ ازیں، پاکستان، ترکیہ اور سعودی عرب کی اسٹریٹجک کمیٹی کے اجلاس میں اسحاق ڈار کے ہمراہ وفاقی وزیرِ دفاع خواجہ آصف اور فیلڈ مارشل عاصم منیر بھی پاکستان کی نمائندگی کریں گے۔