اسحاق ڈار کی ایس سی او سیکرٹری جنرل سے ملاقات، پاکستان کی صدارت پر مبارکباد

بشکیک: نائب وزیراعظم اور وزیر خارجہ سینیٹر اسحاق ڈار نے شنگھائی تعاون تنظیم (SCO) کے سربراہی اجلاس کے موقع پر ایس سی او کے سیکرٹری جنرل سے اہم ملاقات کی، جس میں پاکستان کی 2026-27 کی صدارت اور تنظیم کے آئندہ لائحہ عمل پر تفصیلی تبادلہ خیال کیا گیا۔

ترجمان دفتر خارجہ کے مطابق ایس سی او کے سیکرٹری جنرل نے پاکستان کو 2026-27 کے لیے تنظیم کی صدارت سنبھالنے پر مبارکباد پیش کی۔ نائب وزیراعظم اسحاق ڈار نے سیکرٹری جنرل کو ایس سی او کی صدارت کے دوران پاکستان کی مقرر کردہ ترجیحات، حکمت عملی اور علاقائی تعاون کے فروغ سے متعلق وژن سے تفصیلی طور پر آگاہ کیا۔

ترجمان نے مزید بتایا کہ سیکرٹری جنرل نے پاکستان کی ترجیحات کی مکمل حمایت کا اعادہ کیا اور یقین دہانی کرائی کہ ایس سی او سیکرٹریٹ پاکستان کی صدارت کی مدت کے دوران ہر ممکن اور مکمل تعاون فراہم کرے گا۔ ملاقات میں پاکستان اور ایس سی او سیکرٹریٹ کے درمیان قریبی رابطے اور مشترکہ پیش رفت کو جاری رکھنے پر اتفاق کیا گیا۔ اس موقع پر سیکرٹری خارجہ آمنہ بلوچ اور ایس سی او کے قومی کوآرڈینیٹر ڈاکٹر محمد فیصل بھی موجود تھے۔