نائب وزیرِ اعظم اسحاق ڈار کی زیرِ صدارت اجلاس، اضافی کفایت شعاری اقدامات میں 30 جون تک توسیع کی سفارش

اسلام آباد: نائب وزیرِ اعظم اور وزیرِ خارجہ سینیٹر اسحاق ڈار کی زیرِ صدارت ایندھن کی بچت اور قومی کفایت شعاری اقدامات پر ایک اعلیٰ سطح کا جائزہ اجلاس منعقد ہوا۔ اجلاس میں ملک بھر میں توانائی بچت کی مہم پر ہونے والی پیش رفت اور عوامی سہولیات کے لیے کیے جانے والے اقدامات کا تفصیلی جائزہ لیا گیا۔ اس موقع پر مختلف وزارتوں اور ڈویژنز کی جانب سے بعض ضوابط سے استثنیٰ حاصل کرنے کے لیے دی گئی درخواستوں پر غور کیا گیا اور متعلقہ سفارشات کو حتمی شکل دی گئی۔

عوامی سہولت کو اولین ترجیح دیتے ہوئے اجلاس میں فیصلہ کیا گیا کہ وزارتِ خارجہ اور اس کے تمام علاقائی رابطہ دفاتر میں قونصلر تصدیقی (Consular Verification) خدمات جمعہ کے روز بھی باقاعدگی سے جاری رکھی جائیں گی۔ اس فیصلے کے تحت کوئٹہ، کراچی، پشاور، گجرات اور لاہور میں قائم دفترِ خارجہ کے رابطہ دفاتر جمعہ کو بھی پبلک کے لیے کھلے رہیں گے۔ مزید برآں، اجلاس نے 13 جون 2026 کو ختم ہونے والے اضافی کفایت شعاری اقدامات کی مدت میں 30 جون 2026 تک توسیع کرنے کی اہم سفارش کی ہے۔ اسی طرح، کاروباری طبقے اور عوام کی سہولت کے پیشِ نظر گروسری اور کریانہ سٹورز کے اوقاتِ کار کو رات 10 بجے تک بڑھانے کا فیصلہ کیا گیا ہے، اور یہ نئے اوقاتِ کار ہفتے کے تمام دنوں بشمول ہفتہ اور اتوار کو بھی یکساں طور پر لاگو ہوں گے۔